Надвор’е штодзённа ўносіць карэктывы ў планы работы лагера, і таму мы 4 ліпеня, скарыстаўшы адносна цеплаваты і сонечны дзень, рушылі на школьны агарод. Няблага ўзышлі ў гэтым годзе сталовыя буракі і морква. Калі іх своечасова прапалоць і прарваць – будзе добры ўраджай. Усе працавалі старанна і, як вынік, прапалолі адзін участак.
Добра адпачыць пасля працы на свежым паветры!
У гэты дзень да нас у лагер завітаў старшы ўчастковы інспектар інспекцыі па справах непаўнаўналетніх Шаркаўшчынскага РАУС Іван Іосіфавіч Пачкоўскі, які ў чарговы раз правёў з навучэнцамі змястоўную гутарку аб правілах паводзін у грамадскіх месцах, на вуліцы, каля вадаёмаў. Іван Іосіфавіч нагадаў школьнікам аб абмежаванні знаходжання на вуліцы ў вячэрні час.
У другой палове дня навучэнцы з атрадаў “Ручайкі” і “Тутэйшыя” удзельнічалі ў спартыўных спаборніцтвах.
Мабільны велаатрад “Спадарожны вецер” накіраваўся ў падарожжа на роварах “Помнікі прыроды нашага краю”.
“Лета – на здароўе” – гэта асноўны прынцып, якім кіруюцца навучэнцы і педагогі грамадска-патрыятычнага лагера “Нашчадкі”.